Bat karani mujhe mushkil kabhi aisi to na thi
Jaisi ab hai teri mahafil kabhi aisi to na thi
Le gaya chin ke kaun aj tera sabr-o-qarar
Beqarari tujhe ai dil kabhi aisi to na thi
Chashm-e-qatil meri dushman thi hamesha lekin
Jaise ab ho gai qatil kabhi aisi to na thi
Un ki ankhon ne khuda jane kiya kya jadu
Ke tabiyat meri mail kabhi aisi to na thi
Aks-e-rukh-e-yar ne kis se hai tujhe chamakaya
Tab tujh mein mah-e-kamil kabhi aisi to na thi
Kya sabab tu jo bigarata hai “zafar” se har bar
Khu teri hur-e-shamail kabhi aisi to na thi
